Þriggja heimsálfu spjall

Það getur verið gaman að tækninni.  Við vorum að enda við klukkutíma spjall, þrír gamlir vinir yfir þrjár heimsálfur í gegnum Skype.  Bloggari í Kampala, Siggi Ásgeirs á Íslandi og Nonni Gríms í Seatle.  Við hlógum ógurlega þegar við rifjuðum upp bernskubrekin og prakkaraskapinn.  Nú er komið að því að skrifa atvinnusögu okkar, sem jafnast nærri því á við útrásarvíkingana.  Málið er að maður á ekki að taka þessa hluti of alvarlega heldur að hafa gaman af og minnast ánægjulegra augnablika sem gera lífið þess virði að lifa því.

Fyrsta sagan mun heita ,,fýrtomma í ská í sigurverkið" og segir frá harðfiskverkun þar sem Þórður Júl var sérlegur ráðgajfi okkar.  Sennilega kom það í veg fyrir að við urðum NonniGunn Group sem hefði gert okkur að milljónerum.  Varlega áætlað.

Athugasemdir

[Ívar Pálsson, 29.6.2009 kl. 10:27]

Þetta líst mér á! Allt gott héðan, ég ok mótorhjólinu austur og fjöllin heilla. Það vantar gædinn, hann er í Úganda að bjarga heiminum!

[Gunnar Þórðarson, 29.6.2009 kl. 16:20]

Heill og sæll Ívar. Ég er alveg að deyja úr heimþrá. Sjö mánuðir eru of langur tími í senn. Það fljúga neistarnir undan felgunum þegar dekkin eru horfin. Þannig að ég treysti mér eiginlega ekki í pólitísku átökin og læt því gamminn frekar geysa á léttu nótunum.  Þó er af nógu að taka í pólitíkinni þessa dagana.

Ég hlakka til að koma heim og það verður gaman að hitta þig og þína.

[Ívar Pálsson, 30.6.2009 kl. 01:00]

Það eru þó nokkur fjöll óklifin og svæði ókönnuð þetta sumarið: Jarlhettur og nágrenni heilla sérstaklega núna. Herðubreið bíður alltaf, en kannski það takist þetta árið. Af nógu að taka til þess að gleyma Icesave- klúðrinu osfrv.

Ég var á borgarafundi í Iðnó áðan. Einar Már rithöfundur fór á kostum. Maður klappaði með eins og salurinn, enda Einar Már rökfastur og skemmtilegur með afbrigðum,þótt að hann sé hinum megin á vegasalti sjórnmálanna við mig. Þetta er allt annað að upplifa svona fjöldafund (standandi, ekkert pláss) heldur en að horfa á þetta í sjónvarpi. Steingrímur J. átti á brattann að sækja, sérstaklega þegar félagar eins og Einar Már gerðu honum erfitt fyrir.