Þjóðernisrómantík

Ég uppgötvaði nýja vídd í lífinu um daginn.  Að hlusta á I-pod á hlaupum og gleyma sér yfir tónlist í skokki.

Nú er ég alveg húkkt á þessu og er farinn að hafa hvert skokk með sínum tón.  Á laugardaginn var það Megas en í kvöld var það þjóðernisrómantík.  Ég tók  Íslandslög með KK og Magnúsi og hellti mér út í íslenska rómatík, runna frá íslenskum sveitum og vestfirsku sjávarlöðri.

Þetta var alveg ótrúlegt og hvert lagið tók við af öðru.  Ég fann hvernig hárin risu aftan á hnakkanum og ljúfar tilfinningar hrísluðust um mig allan.  Æskudagar í sólskyni í heimasveitinni og ungi maðurinn sem fór á sjóinn og skildi ástina sína eftir með von um að hún héldi tryggð við sig.  Ég fann lyktina af hvönninni í Fljótavík og birkinu í Tunguskógi.  Heimþráin heltók mig og söknuður um fjölskyldu og vini komu gæsahúð út í 33° hita.  Það er á svona stundum sem maður myndi stökkva fyrir björg fyrir föðurlandið og forsetann.

 

Áður en ég vissi af var komið myrkur í Viktoríugarði og nánast eina birtan var af stækkandi tungli sem nú eru tveir kvartil með 93% fyllingu.  Ekki spillti það rómantíkinni og ég stormaði sveittur og hræður út í öskrandi umferðina.  En ljúfur söngur KK og Magnúsar breyttu blikkbeljum í kindur sem ráfuðu um iðagrænar sveitar Íslands, og rútum í kýr sem bauluðu vinalega á smalann sem hafði dormað og dreymdi um ástina sína einu.  Ekki veit ég hvernig ég komst heim eftir myrkum götunum með geggjaðri umferð Colombo æðandi fram hjá mér. 

En talandi um tunglið þá er poja dagur á miðvikudaginn.  Almennur frídagur til að halda upp á fyllerí mánans.  Eins gott að fylla á ísskápinn með bjór og kjöti þar sem hvorugt má selja á slíkum hátíðardegi.

Næsta skokk-thema verður Rolling Stones.  Ég ætla að vona að vofan af sýslumanninum fræga elti mig ekki á þeim hlaupum.  Ekki það að sá ágæti aðalvíkingur væri slæmur skokkfélagi, en það gæti truflað rómatíkina.

Athugasemdir

[Ívar Pálsson, 24.9.2007 kl. 15:49]

Meira af slíku, Gunnar, meinfyndinn og skemmtilegur! „Á vaktinni“ og „óskalög sjúklinga“ duna í eyrum víkingsins á Sri Lanka. „Sértu velkominn heim“ þegar þú kýst svo.

Ekki er ég þjóðlegur á hlaupunum: Rammstein, Metallica, Green Day, Placebo, The Smiths, Stained og fleiri berja mig áfram í IPod Nano, en ef lífga þarf upp á þetta þá er austurrísk bjórkjallaratónlist og kántrírokk alltaf gott.

En ekki vissi ég að þú stykkir fyrir björg fyrir forsetann... 

[Guðjón Már Þorsteinsson, 24.9.2007 kl. 18:46]

Það er gaman að lesa pistlana þína. Þú lætur manni líða fjandi vel í 3 stiga hita og norðan strekkingsvind. Svei mér þá ef að þú hafir ekki hækkað hitastigið hjá manni :) Haltu áfram að segja frá því sem fyrir augu ber á Sri Lanka og gangi þér vel Gunni minn.

Kv.

Gaui.Þ 

[Gunnar Þórðarson, 25.9.2007 kl. 13:30]

Sælir strákar.  Ég skal ylja ykkur í vetur með notalegum sögum úr hitabeltinu.