Af Landsfundinum skuluð þið þekkja þá

Bloggari er nýkominn af Landsfundi Sjálfstæðisflokksins.  Mikið óskaplega er hann ánægður með flokkinn sinn, Sjálfstæðisflokkinn.  Frá fimmtudegi til sunnudags koma saman á annað þúsund fulltrúar frá öllu landinu, úr öllum starfstéttum og af báðum kynjum, til að takast á við stefnumál flokksins.  Það sem bindur þetta fólk saman er Sjálfstæðisstefnan.  Trúin á einstaklingsframtakið og frelsið með lágmarksafskiptum ríkisvaldsins.

Þátttaka í Landsfundi er ævintýri.  Það er alveg með ólíkindum hvað hinn almenni félagsmaður getur áorkað og haft áhrif á flokk sem hefur í kringum 40% kjörfylgi í Alþingiskostningum.  Þar er tekist hressilega á í nefndarstörfum hinna ýmissa málaflokka þar sem tillaga að stefnu er síðan lögð fram fyrir stóra fundinn í Laugardagshöllinni.  Þar geta enn veður skipst í lofti og stefnan tekið breytingum.  Það sást greinilega bæði á laugardagseftirmiðdaginn og á sunnudagsmorgun.  Þetta er ótrúlega merkilegt starf og óhætt að segja lýðræðisleg vinnubrögð.  Ég er stoltur af því að vera í Sjálfstæðisflokknum.

Bloggari sinnti aðalega tveimur málaflokkum, samgöngumálum og umhverfismálum.  Hvortveggja virðast vera mál málanna í næstu kosningum en gerir aðra málaflokka ekki ómerkilegri fyrir því.  Hart var tekist á í báðum málaflokkunum og margir þurftu að lúta í lægra haldi fyrir meirihluta.  Meðal annars bloggari sem ekki náði öllum sínum sjónarmiðum fram.  Að sjálfsögðu ekki.  Stjórnmál eru málamiðlanir en ákvarðanir eru þó teknar á grunni stefnu Sjálfstæðisflokksins.

Bloggari var að horfa á sjónvarpsfréttirnar á laugardagskvöldið.  Fyrst var sýnt af fundi Samfylkingarinnar úr Egilshöll.  Það vakti athygli hvað létt var yfir fundinum og greinilegt að fundarmenn skemmtu sér vel.  Mikið um gamanmál og svo var fundurinn byrjaður að dansa undir ljúfum tónum frá Baggalút.  Þetta var einhvern vegin ólíkt okkar fundi sem sýnt var frá í næsta fréttaskoti.  Fólk í þungum þönkum og blaðastaflar á borðum, ólíkt hjá Samfylkingunni þar sem borðin voru hrein og fín með kaffibollum og rauðvínsglösum.  Í Laugardalshöllinni var greinilega alvaran við völd en gleðin í Egilshöll.

Bloggari velti fyrir sér hvernig stæði á þessu.  Hans niðurstaða er sú að Samfylkingarfólkinu hafi ekki verið íþyngt með vinnu við stefnumótun.  Sennilega hefur forysta Samflykingarinnar séð um stefnumótunina og leyft fulltrúum á landsfundi að skemmta sér.  Það er mjög ánægjulegt en ekki lýðræðislegt.  Sennilega hefur enginn annar stjórnmálaflokkur en Sjálfstæðisflokkurinn getu til að standa að starfi eins og Landsfundur er.  Til hamingju Sjálfstæðismenn.  Þetta er góður flokkur.

Að lokum er rétt að geta þess að fulltrúi Vestfirðinga, Eyrún Ingibjörg Sigþórsdóttir, sem Ísfirðingar og Bolvíkingar hvöttu til framboðs í miðstjórn, fékk mjög góða kostningu, eða rúm 66% og var með næst flest atkvæði.  Unnur Brá Konráðsdóttir náði kjöri en hún hefur ávallt notið stuðnings Vestfirðinga.  Hnífsdælingurinn Áslaug María Friðriksdóttir fékk einnig góða kostningu og eru þær þrjár í hópi átta kvenna af ellefu manns sem skipa miðstjórn Sjálfstæðisflokksins.  Það er því góður meirihluti kvenna í æðstu stofnun Sjálfstæðismanna.  Það eru góðar fréttir.

Athugasemdir

[Guðmundur Þór Magnússon, 15.4.2007 kl. 18:34]

Maður fær æluna bara upp í háls!

[Skafti Elíasson, 15.4.2007 kl. 22:02]

Já það er gaman að sjá að fólk lætur sig varða hluti, mér finnst að maður eigi að virða andstæðinga sína en þeir gefa manni þá ánægju á því að keppa við þá. flott hjá þér Gunni

[Eggert Hjelm Herbertsson, 17.4.2007 kl. 10:53]

Ég geri athugasemd við eina fullyrðingu hjá þér sérstaklega:"ólíkt hjá Samfylkingunni þar sem borðin voru hrein og fín með kaffibollum og rauðvínsglösum". Þetta er rangt hjá þér - það voru ekki rauðvínsglös þarna.

Hins vegar er hægt að blanda saman gleði og alvöru og það tókst Samfylkingunni svo sannarlega um helgina. Vonandi gátu Sjálfsstæðismenn skemmt sér líka. Ég sé ekki betur en þær ályktanir sem fyrir fund sjálfsstæðiflokksins lágu fyrir og fóru lítið breyttar í gegnum fundinn - hverjir sömdu drög að álytkunum?

[Gunnar Þórðarson, 19.4.2007 kl. 17:23]

Blessaður Eggert.  Ég byðst forláts en taldi víst miðað við gleðina að rauðvín hefði verið þarna.  Ég vona að þetta hafi verið eina staðreyndavillan í pistlinum.